Trivnaðarætlan

Trivnaðarætlanin hjá Skúlanum við Løgmannabreyt

Trivnaðarætlanin er bygd á Virðisgrundarlag skúlans: Menning, Virðing og Yrkisføri

Trivnaður í hásæti 
Í skúlanum við Løgmannabreyt raðfesta vit trivnað í fremstu røð. Dentur verður lagdur á at skapa góðar karmar um skúladagin hjá næmingunum og at tryggja, at øll kenna seg sum part av felagskapinum. Umframt dagliga arbeiðið við trivnaðinum, skipa vit fyri mongum afturvendandi átøkum og tiltøkum at fremja trivnað. 

Næmingasamrøður
Umframt dagliga samskiftið við næmingar hava vit í minsta lagi eina ferð um árið eina tilrættagda næmingasamrøðu um trivnað. Næmingasamrøðuna tekur kontaktlærarin sær av. Kontaktlærarin er lærarin, sum av flokstoyminum er settur at hava serliga sambandið við ávísa næmingin. 

Floksfundur
Vit hava regluliga floksfund, har prátað verður um vinalag, tolsemi, ósemjuloysn, fyrigeving, o.a. Vit leggja okkum eftir, at næmingarnir læra at lurta eftir hvørjum øðrum og at loysa ósemjur á ein góðan og virðiligan hátt. 

Spælibólkar
Fyri at styrkja um felagskapin í flokkinum, verður skipað fyri spælibólkum í 1.-6. flokki. M.a. verður lagt upp til, at næmingarnir fara heim til hvør annan, eisini til onkran, ið tey ikki vanliga spæla við. Dentur verður somuleiðis lagdur á at skapa góð sambond flokkanna millum, og verður hetta gjørt við, at allir flokkarnir í skúlanum hava ein vinaflokk, ið tey gera ymiskt hugnaligt saman við nakrar ferðir um árið. 

Spælilið
Eitt spælilið verður valt á hvørjum ári í 7. flokki. Tey, sum eru í spæliðnum skipa fyri spølum fyri 1., 2. og 3. flokk nøkur fríkorter um vikuna. Hesi fríkorterini spæla allir næmingarnir í flokkinum saman, og er hetta við til at styrkja um samanhaldið í flokkinum. 

Telefonpolitikkur
Grundleggjandi hava næmingar ikki loyvi at nýta fartelefonir í skúlatíðini, sí Telefonpolitikkur skúlans.

Trivnaður og happingarfyribyrging
Vit hava vakin eygu og oyru við næmingunum at tryggja, at teir trívast og at happing ikki er. Javnan skipa flokslærarar og foreldraráð fyri trivnaðarátøkum. Í 3. flokki skipar AKT-lærarin fyri fyribyrgjandi átaki ímóti happing. Og er tørvur á tí, t.d. í øðrum flokkum, verða eyka átøk fyriskipað. Harumframt hava vit eitt tilboð um samrøðubólk fyri børnum, hvørs foreldur eru farin frá hvør øðrum, ið heilsufrøðingurin og AKT - lærarin standa fyri. 

Sorgartilbúgving
Vit hava eina greiða sorgartilbúgving, so at vit hava greiðar mannagongdir eru, tá ið sjúka, vanlukka ella deyði rakar skúlan ella ein av okkara nærmastu.

Um næmingur ikki trívist
Um næmingur ikki trívist venda foreldrini sær til kontaktlæraran, og avtalað verður, um kontaktlærarin tekur sær av hesum, ella um tørvur er á at fara víðari til heilsufrøðingin, AKT - læraran ella skúlavegleiðaran. 

Tað er av stórum týdningi, at foreldur somuleiðis siga kontaktlæraranum frá, um eitthvørt keðiligt er farið fram í skúlanum. Lærarin hevur tá møguleika at gera nakað við hetta og tryggja, at sovorðið ikki fær loyvi at halda áfram, so at næmingarnir kunnu kenna seg tryggar í skúlanum. 

Ótryggleiki í felagskapinum er besti gróðrarbotnur fyri happing, og er tað tí av alstórum týdningi fyri okkum at arbeiða fyri, at næmingarnir kenna seg tryggar og kenna seg at  vera partur av felagskapinum. 

Um foreldur ella lærarar hava varhugan av, at happing: t.e. ein áhaldandi útihýsing/niðurgering av ávísum næmingi fer fram, hava vit greiðar mannagongdir fyri, hvat vit so gera.

Trivnaður er tó ikki bert treytaður av góðum sambondum, men eisini av hvørt næmingarnir kenna seg at megna tað, ið væntað verður av teimum. Vit leggja tí dent á, at næmingarnir fáa hóskandi avbjóðingar í dagligu undirvísingini, so teir kunnu varðveita trúnna á egnan førleika      

Næmingaráð
Næmingaráð er í hádeild, og eru ymiskar broytingar framdar sum úrslit av teirra ynskjum.    
 
Førleikastovan 
Tá ið læraratoymið um ein flokk metir, at tørvur er á serstakari hjálp til ávísan næming, verður prátað við foreldrini um at taka hetta upp við førleikastovuna. Leiðarin á førleikastovuni metir um, hvønn í førleikastovuni hon sendir málið víðari til. Í summum førum vendir førleikastovan sær til Sernám, at fáa ráðgeving. Hetta verður gjørt í samstarvi við foreldrini. 
 
Heim og skúli 
Vit meta tað at vera av alstórum týdningi at hava eitt gott foreldrasamstarv. Allir flokkar byrja skúlaárið við einum kunnandi foreldrafundi. Foreldraviðtalur eru við øll foreldur eina til tríggjar ferðir um árið, har tosað verður um trivnaðin og menningina hjá barninum. Har tørvur er á tí, eru enn fleiri viðtalur. Foreldur eru altíð vælkomin at venda sær til kontaktlæraran, tá ið eitthvørt er, annaðhvørt viðvíkjandi trivnaðinum, læringini ella øðrum hjá barninum. Kontaktlærarin kennir barnið og flokkin hjá barninum væl, og møguleiki er tí at fáa eitt gott prát, um hvat kann gerast fyri at bøta um støðuna. Tá ið tørvur er á tí, verða boð send eftir heilsusystrini ella AKT - læraranum.  

Foreldraráð
Foreldraráð er í hvørjum flokki. Nýtt foreldraráð verður valt hvørt ár. Foreldraráðið stendur fyri at skipa drekkamunnin í flokkunum til jólahaldið. Foreldraráðið skipar somuleiðis fyri tveimum tiltøkum um árið. Eitt fyri næmingarnar og eitt fyri næmingar og familju. Foreldraráðið virkar eisini sum bindilið ímillum foreldrini og lærararnar.