Løgmannabreyt 24. november 2016
Góðu foreldraumboð
Leiðslan í skúlanum við Løgmannabreyt vil við hesum heita á tykkum um at hjálpa okkum við jólahaldinum, sum verður hósdagin 15. desember kl. 16:00 – 18:30.
Vit byrja kl. 16 við framførslum í miðhøllini, og síðani fara flokkarnir í stovuna at hugna sær saman við foreldrum, systkjum og lærarum.
Ætlanin er, at floksstovurnar standa klárar við øllum góðum, tá ið jólahaldið byrjar. Og her er tað, at tit koma inn í myndina.
Hetta biðja vit foreldraumboðini skipa fyri saman við hinum foreldrunum í flokkinum:
Kaffi, te, saft, okkurt til drekkamunnin – køkur, smákøkur, piparnøtir, karamellir, mandarinur ..... tað, ið tit halda vera best.
Tit gera bara til tykkara egna flokk og taka møguligar restir við heimaftur. Umráðandi er bara at hava sovorðið, sum ikki krevur ein tallerk, tí vit ætla bara at hava serviettar. Men um so er, at tit ætla at hava rísalamande, so er tað í lagi við tallerkum.
Vónandi fáa tit onnur foreldur at hjálpa til í flokkinum.
Hetta útvegar/keypir skúlin:
Dúkar, koppar, gløs, teskeiðir, sukurmolar, mjólk at koyra útí, serviettar, ljós o.a.
Sigið flokslærarunum frá, um tit skulu brúka tallerkar til rísalamande.
Neyðugt er at gera kaffi og te og fylla á termokannir heimanífrá, tí skúlin eigur ikki termokannur til øll. Sami trupulleiki er við saftini. Men um tit hava saftfløskur og kannur við, kunnu tit fáa vatnið her...
Tað hevði eisini verið gott, um tit hjálptu okkum at rudda upp, tá alt er liðugt.
Fólk er í skúlanum allan dagin, so tit kunnu koma við øllum, áðrenn sjálvt jólahaldið byrjar.
Um tit hava spurningar, kunnu tit venda tykkum til flokslærararnar.
Túsund takk fyri hjálpina. Uttan tykkum – einki jólahald!
Blíðastu jólaheilsanir
Skúlin við Løgmannabreyt